5ಇ ಮಾದರಿಯ ಪಾಠಯೋಜನೆಯನ್ನು ರಚಿಸುವುದು ಹೇಗೆ?

5ಇ ಮಾದರಿಯ ಪಾಠಯೋಜನೆಯನ್ನು ರಚಿಸುವುದು ಹೇಗೆ?

ರಷ್ಯಾ ದೇಶದ ಮನೋವಿಜ್ಞಾನಿ ಲೇವಾ ವೈಗೋಟಕ್ಸಿ ಅವರ ಜ್ಞಾನ ಸಂರಚನಾವಾದದ ವಿಚಾರಗಳನ್ನು ಆಧರಿಸಿ 5ಇ
ಮಾದರಿಯ ಪಾಠಯೋಜನೆಯನ್ನು ವಿನ್ಯಾಸಗೊಳಿಸಲಾಗಿದೆ. ಇದು ಸ್ವಯಂ ಕಲಿಕೆಗೆ ಹಾಗೂ ಕ್ರಿಯಾತ್ಮಕ ಜ್ಞಾನದ ನಿರ್ಮಾಣಕ್ಕೆ ಪೂರಕವಾದ ವಾತಾವರಣವನ್ನು ನಿರ್ಮಿಸಲು ಶಿಕ್ಷಕರಿಗೆ ಸಹಾಯಕವಾಗುತ್ತದೆ. ಮಕ್ಕಳು ತಮ್ಮ ಅನುಭವದ ನೆಲೆಯಲ್ಲಿ ಹೊಸ ಜ್ಞಾನವನ್ನು ಸೃಷ್ಟಿಸಿಕೊಳ್ಳಲು ಹಾಗೂ ಅನ್ವೇಷಿಸಲು ಶಿಕ್ಷಕರು ನೆರವಾಗಬೇಕು. ಶಿಕ್ಷಕರು ದೀರ್ಘ ಉಪನ್ಯಾಸ ನೀಡುವ ಬದಲು ಮಕ್ಕಳ ಕಲಿಕೆಯನ್ನು ಅನುಕೂಲಿಸುವ, ಉತ್ತೇಜಿಸುವ, ಮಾರ್ಗದರ್ಶಿಸುವ ಚಟುವಟಿಕೆಗಳನ್ನು ತರಗತಿಯಲ್ಲಿ ಆಯೋಜಿಸಬೇಕು. ಇದು
ಸಂತಸದ ಕಲಿಕೆಗೆ ಹೆಚ್ಚು ಗಮನ ನೀಡುತ್ತದೆ. ಪಾಠವನ್ನು ಯೋಜಿಸುವಾಗ 5ಇ ಹಂತಗಳನ್ನು ಜಾಜೂ ತಪ್ಪದೆ ಅನುಸರಿಸಬೇಕು.
ಅವುಗಳೆಂದರೆ,

1.  ತೊಡಗಿಸು 
2.  ಅನ್ವೇಷಿಸು/ಶೋಧಿಸು (), 
3. ವಿವರಿಸು 
4. ವಿಸ್ತರಿಸು  ಮತ್ತು
5. ಮೌಲ್ಯಮಾಪಿಸು 

1. ತೊಡಗಿಸು Engage
ದಿನದ ಕಲಿಕೆಗೆ ವಿದ್ಯಾರ್ಥಿಗಳನ್ನು ಅಣಿಗೊಳಿಸುವುದು, ಕುತೂಹಲವನ್ನು ಹೆಚ್ಚಿಸುವುದು, ಗಮನವನ್ನು ಕೇಂದ್ರೀಕರಿಸುವ ಕೆಲಸ ಈ ಹಂತದಲ್ಲಿ ಆಗಬೇಕು. ಮಕ್ಕಳನ್ನು ಕಲಿಕೆಗೆ ಒತ್ತಾಯಿಸುವುದರ ಬದಲಿಗೆ ಅವರಲ್ಲಿ ಕಲಿಯುವ ಆಸಕ್ತಿ ಬರುವಂತಹ ವಾತಾವರಣವನ್ನು ಸೃಷ್ಟಿಸಿ, ವಿವಿಧ ಚಟುವಟಿಕೆಗಳನ್ನು ನೀಡಬೇಕು. ಈ ಸಂದರ್ಭದಲ್ಲಿ ಮಕ್ಕಳ ಪೂರ್ವಜ್ಞಾನವನ್ನು ಶಿಕ್ಷಕ ಸಮರ್ಥವಾಗಿ ಬಳಸಿಕೊಳ್ಳಬೇಕು. ಇದಕ್ಕಾಗಿ ಕಥೆ, ಉದಾಹರಣೆ, ಹೋಲಿಕೆ, ಪ್ರಶ್ನೆಗಳು, ಪ್ರಚಲಿತ ಅಂಶಗಳು, ಪಾತ್ರಾಭಿನಯ, ಆಟಗಳು, ತಂತ್ರಜ್ಞಾನ ಮುಂತಾದ ಶಾಬ್ದಿಕ ಹಾಗೂ ಅಶಾಬ್ದಿಕ ಸಾಧನ, ತಂತ್ರಗಳನ್ನು ಬಳಸಿಕೊಳ್ಳಬಹುದಾಗಿದೆ. ದಿನದ ಪಾಠದ ಕಲಿಕೆಗೆ ಮಕ್ಕಳನ್ನು ಮಾನಸಿಕವಾಗಿ ಹಾಗೂ ಭೌತಿಕವಾಗಿ ತೊಡಗಿಸುವುದು / ಸಿದ್ಧಗೊಳಿಸುವುದು ಈ ಹಂತದ ಮುಖ್ಯ ಉದ್ದೇಶವಾಗಿದೆ.

2. ಅನ್ವೇಷಿಸು/ಶೋಧಿಸು Explore
ಈ ಹಂತದಲ್ಲಿ ಶಿಕ್ಷಕರು ಪಾಠಕ್ಕೆ ಸಂಬಂಧಿಸಿದ ಸಮಸ್ಯೆಯನ್ನು ಮಕ್ಕಳ ಮುಂದಿರಿಸಿ ಮುಕ್ತವಾಗಿ ಚರ್ಚಿಸಲು ಅವಕಾಶ ನೀಡಬೇಕು. ಅವರು ಪರಸ್ಪರ ಚರ್ಚಿಸಿ, ಅವಲೋಕಿಸಿ ತಮ್ಮ ಅನುಭವದ ನೆಲೆಯಲ್ಲಿ ಜ್ಞಾನವನ್ನು ಅನ್ವೇಷಿಸುತ್ತಾರೆ. ಮಕ್ಕಳು ಪ್ರಶ್ನೆಗಳನ್ನು ಕೇಳಲು ಬೇಕಾದ ವಾತಾವರಣವನ್ನು ಶಿಕ್ಷಕರು ನಿರ್ಮಿಸಬೇಕು. ಈ ಸಮಯದಲ್ಲಿ ಮಕ್ಕಳು ಗೊಂದಲಗಳಿಗೆ ಒಳಗಾಗುವುದು ಸಹಜ. ಏಕೆಂದರೆ, ಅವರ ಚಿಂತನೆಗಳಲ್ಲಿ, ಅಭಿಪ್ರಾಯಗಳಲ್ಲಿ ಒಮ್ಮತವಿರುವುದಿಲ್ಲ. ಈ ಅವಕಾಶವನ್ನೇ ಮಕ್ಕಳು ಬಳಸಿಕೊಂಡು ತಮ್ಮ
ಕಲ್ಪನೆಗಳನ್ನು, ಚಿಂತನೆಗಳನ್ನು, ಅಭಿಪ್ರಾಯಗಳನ್ನು ಸಹಪಾಠಿಗಳೊಂದಿಗೆ ಚರ್ಚಿಸಿ, ತುಲನೆ ಮಾಡಿ ಅಂತಿಮ ತೀರ್ಮಾನಕ್ಕೆ ಬರಬೇಕು. ಈ ಹಂತದಲ್ಲಿ ಶಿಕ್ಷಕರು ಮಾರ್ಗದರ್ಶಕರಾಗಿ ಇಲ್ಲವೇ ವೀಕ್ಷಕರಾಗಿ ಕೆಲಸಮಾಡಬೇಕು. ಭಾಷಾ ಪಾಠಗಳಲ್ಲಿ ಶಿಕ್ಷಕರು ಮೊದಲು ಆಯ್ದ ಗದ್ಯ ಭಾಗವನ್ನು ಮಾದರಿಯಾಗಿ ಓದಬೇಕು, ನಂತರ ಮಕ್ಕಳಿಗೆ ಅದೇ ವಿಷಯವನ್ನು ಮೌನವಾಗಿ ಓದಲು ಮಾರ್ಗದರ್ಶಿಸಬೇಕು. ಮಕ್ಕಳು ಪಠ್ಯದಲ್ಲಿರುವ ವಿಷಯವನ್ನು ತಮ್ಮ ಅನುಭವಗಳ ನೆಲೆಯಲ್ಲಿ ಗ್ರಹಿಸುತ್ತಾರೆ. ಮೌನ ಓದಿನ ಪೂರ್ವದಲ್ಲಿ ಮಕ್ಕಳ ಅರ್ಥಗ್ರಹಿಕೆಗೆ ಸಾಧ್ಯವಿಲ್ಲದಿರುವ ಪದಗಳು ಗದ್ಯ ಭಾಗದಲ್ಲಿ ಇದ್ದಲ್ಲಿ ಮಾತ್ರ ಅಂತಹ ಪದಗಳನ್ನು ಪರಿಚಯಿಸಬೇಕು. ಇಲ್ಲದಿದ್ದಲ್ಲಿ ಪದಗಳ ಪರಿಚಯ ಬೇಕಾಗುವುದಿಲ್ಲ. ಏಕೆಂದರೆ ವಿಷಯ ಸಂದರ್ಭದ ಹಿನ್ನೆಲೆಯಲ್ಲಿಯೇ ಮಕ್ಕಳು ಪದಗಳ ಅರ್ಥವನ್ನು ಕಂಡುಕೊಳ್ಳುವುದಕ್ಕೆ ಈ ಹಂತದಲ್ಲಿ ಅವಕಾಶ ನೀಡಬೇಕು.


3. ವಿವರಿಸು (Express)
ಮಕ್ಕಳು ತಮ್ಮ ಸಹಪಾಠಿಗಳೊಂದಿಗೆ ಚರ್ಚಿಸಿ, ಅಂತಿಮವಾಗಿ ಗ್ರಹಿಸಿದ ಕಂಡುಕೊಂಡ ವಿಚಾರಗಳನ್ನು, ಅಭಿಪ್ರಾಯಗಳನ್ನು ತಮ್ಮದೇ ದಾಟಿಯಲ್ಲಿ, ಸ್ವಂತ ಪದಗಳನ್ನು ಬಳಸಿಕೊಂಡು ವಿವರಿಸುವುದಕ್ಕೆ ಮುಕ್ತ ಅವಕಾಶ ಹಾಗೂ ಉತ್ತೇಜನವನ್ನು ನೀಡಬೇಕು. ವಿದ್ಯಾರ್ಥಿ ವಿವರಿಸುವ ಸಂದರ್ಭದಲ್ಲಿ ಇತರ ವಿದ್ಯಾರ್ಥಿಗಳು ಗಮನವಿಟ್ಟು ಆಲಿಸಬೇಕು. ವಿವರಣೆಗೆ ಪೂರಕವಾದ ಆಧಾರಗಳನ್ನು ಹಾಗೂ ಸ್ಪಷ್ಟನೆಗಳನ್ನು ಆಯಾ ಸಂದರ್ಭದಲ್ಲಿ ಎಲ್ಲರೂ ಕೇಳಬಹುದು ಇಲ್ಲವೇ ಒದಗಿಸಬಹುದು. ಇದೇ ಸಂದರ್ಭದಲ್ಲಿ ವಿದ್ಯಾರ್ಥಿಗಳ ವಿಚಾರಗಳಿಗೆ ಪೂರಕವಾಗಿ ನಿಯಮಗಳನ್ನು, ವ್ಯಾಖ್ಯಾನಗಳನ್ನು ಹಾಗೂ ಸ್ಪಷ್ಟನೆಗಳನ್ನು ನೀಡಬಹುದಾಗಿದೆ. ಮಕ್ಕಳ ತಪ್ಪು ಗ್ರಹಿಕೆಗಳನ್ನು
ಸರಿಪಡಿಸಬಹುದಾಗಿದೆ. ವಿಷಯವನ್ನು ಅಥೈಸುವ ಪ್ರಯತ್ನ ಈ ಹಂತದಲ್ಲಿ ಪ್ರಧಾನವಾದುದು. ಮಕ್ಕಳಿಗೆ ಪ್ರಶ್ನೆ, ಹೋಲಿಕೆ, ಉದಾಹರಣೆ, ಪ್ರಾತ್ಯಕ್ಷಿಕೆ ಮುಂತಾದವುಗಳ ಮೂಲಕ ಸೂಕ್ತ ಬೋಧನಾ ವಿಧಾನವನ್ನು ಅನುಸರಿಸಿ ಕಲಿಸಬೇಕು. ಮಕ್ಕಳಲ್ಲಿ ಅಂತರ್ಗತಾವಗಿರುವ ವಿಚಾರಗಳನ್ನು ಹೊರಗೆಳೆಯುವ ಪ್ರಯತ್ನ ಇಲ್ಲಿ ಸಾಗಬೇಕಿದೆ.

4. ವಿಸ್ತರಿಸು Expand
ವಿದ್ಯಾರ್ಥಿಗಳು ತಾವು ಕಂಡುಕೊಂಡ, ಗ್ರಹಿಸಿದ ವಿಚಾರಗಳನ್ನು ಹೊಸ ಸನ್ನಿವೇಶಗಳಿಗೆ ಅನ್ವಯಿಸುವುದಕ್ಕೆ ಪೂರಕ ವಾತಾವರಣವನ್ನು ಈ ಹಂತದಲ್ಲಿ ಸೃಷ್ಟಿಸಬೇಕು. ಹೊಸ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳುವುದು, ಅವರ ಕಲ್ಪನೆಯನ್ನು ವಿಕಾಸಗೊಳಿಸುವುದು, ಹೊಸ ರೀತಿಯ ಪ್ರಶ್ನೆಗಳನ್ನು ಮಕ್ಕಳು ಕೇಳುವ ಸ್ಥಿತಿಯನ್ನು ನಿರ್ಮಿಸುವ ಕೆಲಸ ಈ ಹಂತದಲ್ಲಿ ಆಗಬೇಕು.ಪಠ್ಯವನ್ನು ಮೀರಿದ ಚಿಂತನೆಗಳು, ಚರ್ಚೆಗಳು ಇಲ್ಲಿ ಆಗಬೇಕು.

5. ಮೌಲ್ಯಮಾಪಿಸು Evaluate
ಪಾಠದ ಆರಂಭದಿಂದ ಅಂತ್ಯದವರೆಗೂ ಎಲ್ಲಾ ಹಂತದಲ್ಲೂ ಮೌಲ್ಯಮಾಪನ ಪ್ರಕ್ರಿಯೆ ನಿರಂತರವಾಗಿರಬೇಕು. ಮಕ್ಕಳ ಜ್ಞಾನ, ಚಿಂತನೆ, ಕೌಶಲ್ಯ, ಅನ್ವಯಿಕತೆ ಹಾಗೂ ಕಲಿಕೆಯಲ್ಲಿ
ಉಂಟಾಗುತ್ತಿರುವ ಬದಲಾವಣೆಗಳನ್ನು ಶಿಕ್ಷಕರು ನಿರಂತರವಾಗಿ ಅವಲೋಕಿಸಬೇಕು, ದಾಖಲಿಸಬೇಕು.
ಈ ಸಂಬಂಧ ಮಕ್ಕಳ ಕಲಿಕೆಯನ್ನು ದೃಢಪಡಿಸುವ ಪ್ರಶ್ನೆಗಳನ್ನು ಹಾಗೂ ಚಟುವಟಿಕೆಗಳನ್ನು ಶಿಕ್ಷಕರು ನೀಡಬಹುದಾಗಿದೆ. ಮುಖ್ಯವಾಗಿ ಬೋಧನಾ ಉದ್ದೇಶಗಳು ಎಷ್ಟರ ಮಟ್ಟಿಗೆ ಸಫಲವಾಗಿವೆ ಹಾಗೂ ಯೋಜಿತ ಕಲಿಕಾ ಚಟುವಟಿಕೆಗಳು ಎಷ್ಟರ ಮಟ್ಟಿಗೆ ಪರಿಣಾಮಕಾರಿಯಾಗಿವೆ,
ಅರ್ಥಪೂರ್ಣವಾಗಿವೆ ಎಂಬುದನ್ನು ಮೌಲ್ಯಮಾಪನದ ಹಂತದಲ್ಲಿ ಶಿಕ್ಷಕರು ಸಮಗ್ರವಾಗಿ ಕಂಡುಕೊಳ್ಳುವುದಾಗಬೇಕು.

Share: